Աշխարհի աւելի քան 50 ղեկավարներու մասնակցութեամբ`. Փարիզի մէջ Ֆրանսացիներու միասնականութեան
եւ ահաբեկչութեան դէմ ղատմական քայլարշաւ
17 զոհ պատճառած եռօրեայ ահաբեկչական յարձակումներէն ետք, աւելի քան 2,5 միլիոն ֆրանսացիներ
երէկ Ֆրանսայի մայրաքաղաք Փարիզի մէջ մասնակցեցան միասնականութեան քայլարշաւի մը: Քայլարշաւին
մասնակցեցան աշխարհի աւելի քան 50 ղեկավարներ, որոնք քալեցին թեւ թեւի անցած` իբրեւ միասնականութեան
ցուցանիշ: Քայլարշաւին մասնակից օտար ղեկավարներուն շարքին էին Բրիտանիոյ, Գերմանիոյ,
Իսրայէլի եւ Թուրքիոյ վարչապետները, ինչպէս նաեւ Պաղեստինեան իշխանութեան նախագահ Մահմուտ
Ապպաս: Մասնակցեցան նաեւ Լիբանանի եւ Հայաստանի արտաքին գործոց նախարարներ Ժըպրան Պասիլ
եւ Էդուարդ Նալբանդեան: Քայլարշաւը ընթացք առաւ Փլաս տը լա Ռեփիւպլիքէն, ապահովական
պատճառներով երկուքի բաժնուեցաւ, ապա վերամիացաւ աւարտին` Փլաս տը լա Նասիոնի մէջ: Մասնակիցները
բացագանչեցին «Ազատութիւն» եւ «Շարլի», ոմանք Ֆրանսայի դրօշը բարձրացուցած էին, իսկ ուրիշներ
մեծ մատիտ մը, որուն կողքին գրուած էր. «Չեմ վախնար»: «Ես Շարլին եմ» կարգախօսը տիրական
էր: Փարիզի քայլարշաւին զօրակցական քայլարշաւներ տեղի ունեցան Լոնտոնի, Մատրիտի, Գահիրէի,
Սիտնիի, Թոքիոյի, Պէյրութի եւ այլ քաղաքներու մէջ, ինչպէս նաեւ ֆրանսախօս տարբեր քաղաքներու
մէջ: Ֆրանսայի նախագահ Ֆրանսուա Հոլլանտ քայլարշաւէն առաջ յայտարարեց, որ «Փարիզը
այսօր աշխարհի մայրաքաղաքն է»` աւելցնելով. «Ամբողջ երկիրը ոտքի պիտի կանգնի»: Ֆրանսայի
արտաքին գործոց նախարար Լորան Ֆապիւս յայտնեց, որ ահաբեկիչներուն իսկական կրօնը իսլամութիւնը
չէ. անոնց միակ կրօնը բարբարոսութիւնն է` աւելցնելով, որ անոնք կրօնը իբրեւ պատրուակ
կ՛օգտագործեն: Ֆապիւս ընդգծեց, որ Ֆրանսան ազատութեանց երկիրն է, որ անոնց համար կը
պայքարի` նշելով, որ վերջին ահաբեկչական իրադարձութիւնները միշտ պիտի յիշուին: Բրիտանիոյ
վարչապետ Տէյվիտ Քամերոն յայտնեց. «Ծայրայեղականներուն ներկայացուցած վտանգը յառաջիկայ
բազմաթիւ տարիներու ընթացքին պիտի մնայ մեզի հետ»: Գերմանիոյ ներքին գործոց նախարար
Թոմաս տէ Մեզիեր յայտնեց, որ անհրաժեշտ է իսլամական կրօնին եւ քաղաքական իսլամութեան
միջեւ տարբերակում մը դնել: Ան ըսաւ, որ պէտք է տարբերակում մը դնել իրենց ոճիրներն ու
սպանութիւնները կրօնով արդարացնող եւ անիրաւութեան կոչ ուղղող իսլամականներուն եւ Գերմանիոյ
մէջ բնակող իսլամներուն միջեւ, որոնք իրենց հաւատքը կ՛ապրին յարգելով երկրին սահմանադրութիւնը`
աւելցնելով, որ վերջիններս ահաբեկչութեան հետ որեւէ կապ չունին: Ֆրանսայի ներքին գործոց
նախարար Պեռնար Քազոնով յայտնեց. «Այսօր ամբողջ Ֆրանսան սուգի մէջ է»: «Ֆրանսան իր արժէքները
ունի, եւ ահաբեկիչները որոշեցին այդ արժէքներուն դէմ յարձակում գործել», ըսաւ ան` աւելցնելով,
որ «ոստիկանական ուժերը եւս մեծ հարուածի ենթակայ դարձան, եւ բնական էր, որ այսօր զանոնք
ողջունենք»: «Ահաբեկչութեան երեւոյթը մեզ բոլորս կը հարուածէ եւ երկիրներուն միջեւ
խտրութիւն չի դներ», նշեց ան: Ֆրանսայի ներքին գործոց նախարարը ըսաւ, որ «ահաբեկչութիւնը
միջազգային եւ եւրոպական երեւոյթ դարձաւ»` աւելցնելով. «Աշխատանք պիտի տանինք Շենկենի
համաձայնութիւնը բարեփոխելու` սահմանին վրայ հսկողութեան միջոցառումներ հաստատելու համար»: Ան
յայտնեց, որ վերջին դէպքերէն պէտք է դասեր քաղել, եւ «ահաբեկչութեան դէմ պիտի պայքարինք
նոր ռազմավարութեամբ մը, որ անվտանգութիւն կը հաստատէ»` աւելցնելով. «Օտար ահաբեկիչ զինեալներուն
եւ անոնց պատկանած կազմակերպութեանց դէմ պայքարիլը առաջնահերթութիւններէն մէկը կը նկատուի»: